China III: El país de los contrastes "Beijing"

Voi pesllar esti recorríu pela estensa China visitando una d'eses ciudaes imprescindibles que ta en plena evolución y que mantién tolos encantos del país de los emperadores y la Gran Muria. Beijing dende que fuere la sede de los Xuegos Olímpicos ya nun ye lo mesmo, tol mundiu col que fales dizlo; con ellos llegó la modernidá y finó con munchos de los encantos que tenía, pero ensin dubia sigue calteniendo atractivos suficientes p’afirmar qu’hai que venir equí enantes de morrer, ye una visita obligada. Pero son importantes dalgunos datos pa nun tener problemes. L’entamu del viaxe tien que ser bonu, colos hoteles contrataos y tolo meyor organizao posible a nun ser que fales chinu; y desplícome, los chinos falen chino y namás. Hai mui pocos qu’entiendan otru idioma, incluso la xente mozo. Garrar un taxi pue convertise nuna odisea y mas si garres un día lluviosu, lo primero porque al ver un occidental bona parte d’ellos nun paren pa evitar la dificultá del idioma y de los que paren, pocos o dengunu van llevate al destín si esti nun cumple colo que-y interesa al taxista; que vaigas na dirección contraria al sentíu de la so marcha; que’l recorríu seya mui llargu; que tees, como yera'l nuesu casu, hospedau nun hotel céntricu, etc…, tenéi en cuenta que los trayectos en taxi nun tienen res que ver con Asturies, si dicía que Shangai yera barato en Beijing ye regalao, pártese de la ridícula cantidá de 10 Yuanes de día y 11 de nueche, eso al cambiu vien a ser pocu mas de 1 € pero un recorríu de 15 minutos de nueche valiónos 15 Yuanes y foi'l mas caru de tolos recorríos. El metru tamien ye perbarato, anque nun tan bonu como’l de Shanghai y petáu de xente en casi toles hores, pero insoportable nes hores puntes, con emburriaores oficiales del metru que traten de meter a la xente onde ya nun garra un res mas; hai que facese fuerte y evitar que te metan mas allá de la puerta, si vas baxate prontu porque lo mas probable que ye quédeste dientro’l vagón. Otra recomendación ye llevar les direcciones escrites en Chino de los sitios onde quies dir (esto fáentelo ensin problemes nel hotel) y nun fíate en escesu de los planos, especialmente nes distancies, ya que la ciudá ye tan grande que lo que pue paecete que ta’l llau ta a 5 kilómetros.  Una cabera recomendación, lleva-y efectivu bastante ya qu'en munchos sitios nun almiten tarxetes. Pero ta claro qu’anque haiga dificultaes, venir a China y colar d’ella ensin pasar per equí ye como nun haber venío, anque namái seya por ver la Gran Muria. La mayor parte de nos tien sentío falar d'esti espaciu enllenu d’encantos, pero fasta que nun tas ehí nun te das cuenta de lo que ye en realidá. Nos escoyimos una zona de la Muria mas alloñada del centru urbanu, concretamente nel distritu d'Huairou, la zona de como Mutianyu.
       Les recomendaciones yeren que nun fuéramos a la zona más turística por qu'aquello paecía un mercadín nel que casique nun podíes facer una semeya ensin qu'apaeciese dalguién.  Al llegar camentamos qu'habíen engañáonos por que nun había sitiu onde poner un coche, pero nun yera asina, amás y anque paeza increíble alcontrámonos por segunda vegada nesti viaxe (la primera foi en Shanghai) a unos asturianos, el gritu de Puxa Sporting al veme cola camiseta del equipu despertó les nueses miraes y allegronos el día. Escoyimos como mediu pa xubir un telesiella al que nomen teleféricu y pa baxar el tobogán pel que deslíceste con un patinín que manexes con un frenu ente les piernes, una esperiencia altamente recomendable. Na propia Muria y comu nun podía ser d’otra mena tienes souvenirs a montones y xente vendiéndote de casi too, nun merquéis dengún tipu d’agua a los mercaderes, lleva-ylo mercao ya d'un establecimientu de la ciudá. Pero nun solo esta estensa ciudá de mas de veinte millones d’habitantes tien la Gran Muria, hai delles coses interesantes y imprescindibles. La Ciudá Prohibío, que fai conxuntu cola Plaza de Tianamen o'l templu de Yong He Gong, onde vas alcontrar el Bulda mas grande del mundiu construíu n’interior y un montón de xente rezando en dixebraos espacios enllenos de maxa d’anguañu, o'l Beihai Park un espaciu verde con tres llagos artificiales impresionantes onde pues pasiar con distintes barques y ver personaxes variopintos. Visites munches y too depende del tiempu y les perres o ganes que tengas, un espectáculu de Kung Fu, la ópera china, los espectáculos d’acrobacies, El Templu del Cielu, el Palaciu de Branu y por supuesto la Villa Ollimpica. Gastronómicamente falando hai coses perinteresantes: La Cai de los bichos, por exemplu onde pónense una colección de chiringuitos que vienden toa clase d'inseutos y otros bichinos, too de bon aspectu y cuidada hixene, daqué que sorprendíome prestosamente y fíxome prebar dellos, culiebra, cucaraches, merucos, formigues, saltapraos, ciempiés… Pero ensin dubies el platu estrella ye’l Coríu Pekines, tou un ritual gastronómicu qu’entama na propia crianza del Coríu y fina nel serviciu, laminau por partes delantre’l cliente. El sitiu mas famosu pa xintalu, pero tamién onde resulta mas complicao facelo pelos horarios y la cantidá de xente que lu frecuenta, ye’l Restorán Roasted Duck nel númberu 32 de Quianmen Dajie, una de les zones recuperaes na dómina los Xuegos Ollimpicos y convirtiose nun exe comercial de gran atrautivu. Y si quies dir al que ta consideráu'l meyor de la ciudá, pero que pocu o un res tien que ver cola gastronomía China, ta'l contemporaneu The Courtyard nel llateral de la Ciudá Prohibida y qu'a mi personalmente paecíome caru y con pocu atractivu, pagamos 1.725 Yuanes unos 205 € cuando la media venía siendo unos 25 €.
Ayalgues Gastronómiques:
Anque nun seya propiamente dicho un productu, si que ye toa una ayalga gastronómica porque nun podríamos facelo d’otra mena. La Snack Street, popularmente conocía comu “cai de los bichos”, onde realmente vas al menos a esfrutar una gran esperiencia.
Snack Street
PREBA: La culiebra ye quiciabes l'únicu pinchu que realmente puo dicir que taba buenu, con una carne de ciertu toque amargu pero sabrosa, el restu de larves, meruquinos y bichos dellos fríenlos tantu que nun dexen de ser un cruxente de pocu sabor, mas allá del turriáu de la fritura y el de los picantes qu’échente.
SERVICIU: Sírvente en puestos de bon aspectu y casi too ye frito esceptuando les andariques, ñocles y dalgunos dulces que faen a la plancha.
PVP Aprosimau: 7 € si prebes 7-8 coses.
 

Al platu vendrás arbeyu
Quanjude Roasted Duck
6 Planta del Silk Market. No.8 East Xiushui Street, Chaoyang District
Preciu Mediu: 90 Yuan (10 €)
Calificación: 8,5/10 (Cocina Internacional)
Unu de los munchos establecimientos d’esta afamada cadena que lleva dende 1864 faciendo'l Coríu de la mesma manera. Una de les mayores ventaxes que tien pa nos esti establecimientu respeutu al orixinal que citamos nel artículu, ye’l so ampliu horariu de 9 de la mañana a 9 de la nueche. Faen l'aunténticu ritual del Coríu Pekines y tienes unes atractives vistes de los edificios más modernos de la ciudá, amás pues gastar unes bones perres nel Mercáu de la Seda, onde alcontrar de casique tou.

Este artículo se publico en el semanario Les Noticies el pasado mes de enero